សៀមរាប៖ នាយករដ្ឋមន្ត្រីកម្ពុជា និងជាប្រធានអាស៊ានឆ្នាំ២០២២ សម្ដេចតេជោ ហ៊ុន សែន បានលើកឡើងពីសក្ដានុពលនៅក្នុងតំបន់អាស៊ានក្នុងពេលដែលពិភពលោកកំពុងប្រឈមទៅនឹងវិបត្តិដែលកើតឡើងពីការដាក់ទណ្ឌកម្មទៅលើប្រទេសរុស្ស៊ីដោយសហភាពអឺរ៉ុបនិងសម្ព័ន្ធមិត្តរបស់ខ្លួន។

ក្នុងជំនួបជាមួយនឹងរដ្ឋលេខាធិការប្រចាំការក្រសួងសេដ្ឋកិច្ចនិងហិរញ្ញវត្ថុព្រុយណេ MAY FA'EZAH BINTI HAJI AHMAD ARIFFIN នៅទីក្រុងសៀមរាប ខេត្តសៀមរាប សម្ដេចតេជោ ហ៊ុន សែន បានលើកឡើងថាបន្ទាប់ពីពិភពលោកកំពុងតែចាប់ផ្ដើមងើបឡើងវិញពីវិបត្តិនៃជំងឺកូវីដ-១៩ ពេលនេះបានប្រឈមទៅនឹងវិបត្តិថ្មីគឺភាពច្របូកច្របល់នៃសេដ្ឋកិច្ចដែលកើតឡើងអំពីការដាក់ទណ្ឌកម្មទៅលើប្រទេសរុស្ស៊ីដែលបង្កឲ្យមានផលប៉ះពាល់ទៅដល់ប្រទេសនានានៅទូទាំងពិភពលោករួមទាំងកម្ពុជាផងដែរ។

បើទោះជាយ៉ាងនេះក្ដី សម្ដេចមើលឃើញថាកម្ពុជាបានកំពុងបានសម្រេចនូវទំហំពាណិជ្ជកម្មកើនឡើងនៅក្នុងតំបន់ ដែលសម្ដេចគិតថាវាជាសក្ដានុពលថ្មីមួយនៃតំបន់អាស៊ាន។

ជំនួយការសម្ដេចតេជោគឺលោក អ៊ាង សុផាល្លែត បានប្រាប់អ្នកយកព័ត៌មានថា៖ «ទោះជាយ៉ាងណាក៏ដោយក្នុងកាលៈទេសៈនេះបានរំលេចចេញនៅកាលានុវត្ថភាពខាងសេដ្ឋកិច្ចពីការកើនឡើងនៅលើវិស័យពាណិជ្ជកម្មក្នុងតំបន់ជាអាទិ៍ពាណិជ្ជកម្មរវាងកម្ពុជានិងវៀតណាមពាណិជ្ជកម្មរវាងកម្ពុជានិងថៃពាណិជ្ជកម្មរវាងកម្ពុជានិងឡាវហ្នឹងពាណិជ្ជកម្មរវាងប្រទេសកម្ពុជាជាមួយនឹងប្រទេសនៅក្នុងតំបន់មួយចំនួនទៀតមានការកើនឡើង»។

ក្នុងន័យនេះសម្ដេចតេជោ បានផ្ដល់អនុសាសន៍ឱ្យប្រតិភូទាំងមូលនៅអនុសាសន៍ដែលមានពង្រីកបន្ថែមនូវការធ្វើពាណិជ្ជកម្មក្នុងក្របខណ្ឌ AFTA ជាពាណិជ្ជកម្មបំពេញឲ្យគ្នាទៅវិញទៅមកជាមួយនឹងការធ្វើពាណិជ្ជកម្មជាមួយនឹងប្រទេសដទៃទៀតរួមទាំងក្នុងក្របខណ្ឌ ASEM ផងដែរ៕ 

^{PHOTO: KOK KY}